Stóð til að Harewood færi til Hull

Allt útlit var fyrir að Marlon Harewood yrði lánaður til Hull frá Aston Villa í gær en félagaskiptin gengu ekki í gegn áður en félagskiptaglugginn lokaði.

Umboðsmaður Harewood sagði í samtali við enska fjölmiðla að Hull City hefði samþykkt félagaskiptin fyrir sitt leyti en að hann hafi svo ekkert heyrt í forráðamönnum liðsins þegar á reyndi.

Fram hefur komið í fjölmiðlum að til stóð að lána Harewood til Hull til áramóta. Félagið hafði síðan möguleika á því að kaupa hann frá Aston Villa á tvær milljónir punda.

„Ég fékk símtal frá Phil (Brown, stjóra Hull) og hélt að þetta myndi ganga í gegn. En svona er fótboltinn og svona lagað getur gerst á lokadegi félagaskiptagluggans," sagði umboðsmaðurinn í samtali við enska fjölmiðla.

„Ég fór því og ræddi málin við þá hjá Villa. Þeir voru ánægðir með samkomulagið og þetta var allt frágengið hvað þá varðaði. Ég reyndi svo að hringja í Phil síðdegis en náði aldrei í hann."

„En Marlon mun ná sér á strik þrátt fyrir þetta."