Ókeypis bílastæðum fækkað

Gjaldfrjálsum bílastæðum fyrir starfsfólk Reykjavíkurborgar verður fækkað á næstu misserum. Ráðhúsið og skrifstofa borgarinnar í Borgartúni eru dæmi um mannmarga vinnustaði borgarinnar sem líklegt er að finni fyrir því.

Breytingarnar eru hluti af „grænni samgöngustefnu" sem Reykjavíkurborg hefur tekið upp og miðar að því að hvetja starfsmenn borgarinnar til að fara um með umhverfisvænni hætti. Ekki hefur verið tekin ákvörðun um hversu mörgum stæðum verður fækkað, að sögn Gísla Marteins Baldurssonar, formanns umhverfis- og samgönguráðs Reykjavíkurborgar. Stefnan verði útfærð á hverjum vinnustað borgarinnar fyrir sig. „Við munum hvetja okkar starfsmenn til að koma til vinnu öðruvísi en á bíl. Hluti af því er að fækka ókeypis bílastæðum við vinnustaðina en reyna á móti að styrkja þá sem vilja koma með öðrum hætti til vinnu."

Gísli telur að starfsmenn borgarinnar muni ekki líta á fækkun gjaldfrjálsra bílastæða sem kjaraskerðingu. „Það er ekki markmiðið að skerða kjör heldur einmitt að bjóða möguleika sem koma betur út fyrir starfsmanninn fjárhagslega. Allir sem vinna í miðbænum búa við gjaldtöku og það er almenn sátt í samfélaginu að svo sé. Er endilega eðlilegt að annað gildi um starfsmenn borgarinnar?" spyr Gísli.

- hhs