Moyes: Ég er óneitanlega vonsvikinn með Lescott

Knattspyrnustjórinn David Moyes hjá Everton gat ekki neitað því að hegðun varnarmannsins Joleon Lescott hafi valdið sér vonbrigðum á blaðamannafundi í dag en leikmaðurinn mætti ekki á síðustu æfinguna fyrir leikinn gegn Sigma Olomouc í Evrópudeild UEFA sem fram fer á morgun.

Hinn skoski Moyes ákvað í framhaldinu að velja Lescott ekki í leikmannahópinn fyrir leikinn en ítrekaði að hann vildi sem fyrr alls ekki selja leikmanninn til Manchester City.

„Ég er óneitanlega vonsvikinn með þessa hegðun og það eru einnig liðsfélagar hans. Lescott hefur ekki verið líkur sjálfum sér síðustu vikurnar út af þessu máli með City en ég held mig við það að hann verði ekki seldur.

Ég vonast til þess að þetta mál verði úr sögunni þegar félagsskiptaglugganum lokar," segir Moyes.

Everton er þegar búið að neita tveimur kauptilboðum frá City í Lescott sem og handritaðri beiðni frá leikmanninum sjálfum um að vera settur á sölulista.

Hegðun Lescott er vafalítið hans leið til þess að þvinga sölu en Moyes er greinilega ekki tilbúinn að gefa eftir.