Einn starfsráðgjafi á hverja þúsund á atvinnuleysisskrá

Vinnumálastofnun hefur aðeins ráðið þrjá náms- og starfsráðgjafa frá hruninu þrátt fyrir að atvinnulausum hafi fjölgað um mörg þúsund manns. Atvinnulausir í október voru tæplega þrettán þúsund en spár um þróun atvinnuleysis gera ráð fyrir að þeim fjölgi hratt á næstunni. Ráðgjafar á höfuðborgarsvæðinu voru sjö fyrir hrunið en eru nú tíu talsins. Fjöldi viðskiptavina hefur tífaldast frá því í október 2008 og eru þeir um tíu þúsund á höfuðborgarsvæðinu.

Gissur Pétursson, forstjóri Vinnumálastofnunar, segir að þegar allt er talið starfi um tuttugu ráðgjafar á fimmtán stöðum á landinu. Þeir séu hins vegar allt of fáir. „Það má orða það sem svo að hver einasti náms- og starfsráðgjafi sem bætist við væri vel þeginn." Starfsmönnum stofnunarinnar hefur verið fjölgað um hátt í þrjátíu frá áramótum. Þeir sinna hins vegar bótaútreikningi og greiðslum til atvinnulausra en ekki svokölluðum virkniúrræðum. Gissur segir það skjóta skökku við að á meðan stofnunina sárvanti náms- og starfsráðgjafa gangi margir með slíka menntun um atvinnulausir. Hins vegar hefur stofnunin ekki fjármagn til að ráða þá í vinnu.

Þórdís Guðmundsdóttir, náms- og starfsráðgjafi hjá Vinnumálastofnun, segir vonlaust að tíu ráðgjafar geti sinnt öllum þeim fjölda fólks sem nú er atvinnulaust. „Við náum 800 til 1.000 einstaklingsviðtölum á mánuði sem þýðir að það tæki okkur tólf mánuði að ná til allra þeirra sem eru á skrá í dag."

Þórdís bendir á að fjöldinn allur af starfshópum hafi farið yfir vandann og fyrir liggi rannsóknir sem sýni skaðsemi atvinnuleysis. „Á meðan fjárvana stjórnmálamenn stofna nefndir vantar okkur fólk og peninga til að lágmarka skaðann sem langtímaatvinnuleysi veldur," segir Þórdís. Hún segir að ef vel ætti að vera ættu að starfa fjörutíu ráðgjafar á höfuðborgarsvæðinu.

Árni Páll Árnason, félags- og tryggingamálaráðherra, segir ekki mögulegt að fjölga starfsfólki stofnunarinnar í takt við óskir þeirra sem þar starfa. Til þess er ekki til fjármagn. „Það er hins vegar óskastaðan og við vinnum að því með öllum ráðum að skapa það svigrúm."

- shá