Defoe hótar að kæra lögregluna í Essex

Framherjinn Jermain Defoe hjá Tottenham hefur verið sjóðandi heitur í upphafi ensku úrvalsdeildarinnar og skoraði þrennu í 1-5 sigri gegn Hull á dögunum.

Defoe stendur hins vegar í ströngu utan vallar vegna ósættis við lögregluna í Essex á Englandi og hótar að kæra laganna verði fyrir að stoppa sig hvað eftir annað þegar hann keyrir um í glæsikerru sinni fyrir engar sakir.

Knattspyrnustjórinn Harry Reknapp hjá Tottenham hefur komið framherjanum til varnar og segir framferði lögreglunnar vera til skammar og veltir fyrir sér af hverju hún hagar sér með þessum hætti.

„Strákurinn keyrir um á stórum og flottum bíl og af hverju má hann það ekki? Svartur strákur að keyra um á glæsikerru, er eitthvað af því? Ég skil ekki af hverju lögreglan er alltaf að stoppa hann.

Þú þarft ekki heldur að vera klæddur í jakkaföt, skyrtu og bindi og vinna á skrifstofu til þess að geta keypt þér glæsikerru. Ég skil fullkomlega að Jermain finnist hann vera lagður í einelti miðað við þessa hegðun lögreglunnar," segir Redknapp.