Fabregas og Brown kærðir

Enska knattspyrnusambandið hefur ákveðið að kæra þá Cesc Fabregas, fyrirliða Arsenal, og Phil Brown, knattspyrnustjóra Hull, fyrir ósæmilega framkomu að loknum leik liðanna í ensku bikarkeppninni.

Fabregas spilaði ekki í leiknum sem Arsenal sigraði í, 2-1, vegna meiðsla en hann gekk inn á völlinn að honum loknum og var gefið að sök að rífast í leikmönnum Hull og að hafa hrækt á Brian Horton, aðstoðarknattspyrnustjóra Hull.

Brown er kærður fyrir þau ummæli sem hann lét hafa eftir sér í fjölmiðlum eftir leikinn um dómara leiksins, Mike Riley.

Þeir hafa frest til 12. maí til að svara kærunum en Arsene Wenger, stjóri Arsenal, sagði enn óvíst hvort félagið myndi áfrýja.