Everton samþykkir nýtt risakauptilboð í Lescott

Enska úrvalsdeildarfélagið Everton hefur samþykkt nýtt kauptilboð Manchester City í varnarmanninn Joleon Lescott en kaupverðið er talið nema um 24 milljónum punda.

Everton var áður búið að neita tveimur kauptilboðum í leikmanninn upp á 15 og 18 milljónir punda auk þess að neita leikmanninum sjálfum um að vera settur á sölulista.

Knattspyrnustjórinn David Moyes hjá Everton játaði sig þó sigraðan á endan eftir að Lescott neitaði ítrekað að spila og mæta á æfingar. Moyes getur þó varla kvartað yfir ávöxtuninni á leikmanninum sem kom til Everton frá Wolves á 5 milljónir punda árið 2006.

Áður en gengið verður frá félagsskiptunum þarf Lescott að samþykkja samning hjá City og gangast undir læknisskoðun en búist er við því að það gangi í gegn á morgun.