Arshavin: Við þurfum að kaupa fleiri gæðaleikmenn

Hinn rússneski sóknarmaður Andrey Arshavin hjá Arsenal liggur sjaldan á skoðunum sínum en nú hefur hann stigið fram og hvatt forráðamenn Arsenal til þess að fjárfesta í nýjum leikmönnum áður en leikmannaglugganum lokar 1. september.

Arshavin telur að til þess að Arsenal blandi sér í baráttuna um þá titla sem í boði eru þurfi félagið að eyða í leikmannakaup líkt og stærstu félög í Evrópu.

Arsenal hefur byrjað tímabilið með stæl og unnið Everton 1-6 og Porstmouth 4-1 en Arshavin er samt ósáttur við stöðu mála.

„Við getum ekki verið að miða okkur við félög eins og Everton. Við eigum að miða okkur við Chelsea, Manchester United, Real Madrid og Barcelona. Við eigum að gera það sama og þau og kaupa heimsklassa leikmenn sama á hversu gamlir þeir eru. Við þurfum að kaupa fleiri gæðaleikmenn. Það er mín skoðun," segir Arshavin í viðtali við Sunday Times.