Everton búið að finna eftirmann fyrir Lescott?

Flest virðist benda til þess að varnarmaðurinn Sylvain Distin sé á förum frá Portsmouth til Everton en stjórnarformaðurinn Peter Storrie hjá Portsmouth hefur staðfest að leikmaðurinn vilji yfirgefa Fratton Park.

„Ég býst fastlega við því að Distin muni fara frá okkur og hann hefur þegar farið fram á sölu. Ég er ekki viss um hversu snemma eitthvað muni gerast í hans málum en við erum með kauptilboð frá Everton í höndunum," var haft eftir Storrie í viðtali við Portsmouth News.

Everton seldi Joleon Lescott sem kunnugt er til Manchester City í gær og búist er við því að knattspyrnustjórinn David Moyes hjá Everton vilji fá tvo miðverði í hans stað og Disin er sagður annar þeirra.