Telur tölvuútboð ekki svara kostnaði

Óvíst er hvort tölvuþjónusta Akraneskaupstaðar verður boðin út, líkt og bæjarráð fól bæjarstjóra að undirbúa fyrr í sumar. Fulltrúar minnihlutans gagnrýna þetta og segja eðlilegt að þjónustan sé boðin út.

Samningur er í gildi á milli bæjarins og fyrirtækisins Securstore. Það er í eigu Bjarna Ármannssonar, fyrrverandi forstjóra Glitnis, sem er stjórnarformaður, og Arnar Gunnarssonar, sonar Gunnars Sigurðssonar, forseta bæjarstjórnar.

Bæjarráð ákvað í fyrra að bjóða þjónustuna út, en hætti síðan við og samdi við fyrirtækið. Á fundi sínum 30. júní fól ráðið bæjarstjóra að undirbúa útboð á tölvuþjónustu. Á næsta fundi þar á eftir var honum einnig falið að leita eftir afslætti á öllum fyrirliggjandi samningum.

Sveinn Kristinsson, oddviti Samfylkingarinnar, segir ljóst á greinargerð bæjarstjóra, sem lögð var fram á fundi 3. september, að meirihlutinn ætli sér að framlengja samninginn. Þar sé útboðum fundið allt til foráttu, sem sé sérkennilegt, ekki síst á þessum sparnaðartímum.

Gísli S. Einarsson bæjarstjóri segir ólíklegt að útboð mundi skila bæjarfélaginu betri kjörum. Hann segir að kostnaður við samning um hýsingu og afritun sé um sex milljónir. Þar við bætist útseldir tímar vegna annarrar þjónustu. Hann segir fyrirtækið hafa boðið 25 prósenta lækkun á samningi. Bæjarráð taki afstöðu til þess hvort farið verði í útboð en sjálfur telji hann kostnað við það of mikinn miðað við ávinning.

Samfylkingin hefur farið fram á að kostnaður af samningi við Securstore sé metinn. Sveinn segir það lágmark áður en ákvörðun verði tekin um framlengingu samnings, þó að eðlilegast væri að fara í útboð. Kostnaður virðist vera um 26,5 milljónir á síðustu tólf mánuðum og samkvæmt innkaupareglum eigi því að fara í útboð.

Þá segir Sveinn óljóst hvort tilætlaður sparnaður við það að hætta við útboð í fyrra hafi náðst.

„Mér sýnist miðað við þær greiðslur sem farið hafa í tölvumálin að þær hafi hækkað stórkostlega, en ekki lækkað.“ Sveinn óttast að verið sé að gefa fyrirtækinu stöðu til sjálftöku úr bæjarsjóði.

kolbeinn@frettabladid.is