Borgarbúar finna fyrir öryggi að næturlagi

Mikill meirihluti íbúa, eða tæplega 90 prósent, sagðist mjög eða frekar öruggur einn á gangi að næturlagi í sínu hverfi. Um 63 prósent þátttakenda sagðist hins vegar mjög eða frekar óöruggur einn á gangi í miðborg Reykjavíkur. Þetta kemur fram í skýrslunni Afbrot á höfuðborgarsvæðinu 2008 - Dreifing tilkynntra brota eftir svæðum og reynsla íbúa af lögreglu, öryggi og afbrotum.

Í þessari skýrslu er fjallað um tíðni afbrota á höfuðborgarsvæðinu á árunum 2005 til 2008 og einnig um niðurstöður könnunar á viðhorfi íbúa höfuðborgarinnar til lögreglu, reynslu af afbrotum og öryggistilfinningu þeirra. Þetta er í þriðja sinn sem lögreglan á höfuðborgarsvæðinu gefur út tölfræðiskýrslu í þessari mynd, en markmiðið með henni er meðal annars að halda árlega skrá yfir afbrot á höfuðborgarsvæðinu, mæla þróun í afbrotatíðni milli ára, gera samanburð eftir svæðum og tengja umfjöllunina við lýðfræðilegar upplýsingar og niðurstöður könnunar um upplifun íbúa af afbrotum.

Meðal annars kemur fram í skýrslunni að hegningarlagabrotum fjölgaði um 14 prósent árið 2008 sé litið til meðaltals áranna 2005-2007. Fjölgun brota árið 2008 markast mjög af fjölgun þjófnaðarbrota og þá ekki síst innbrota. Hins vegar fækkaði ofbeldisbrotum og eignaspjöllum.

Árið 2008 áttu mun fleiri brot sér stað í Miðborg Reykjavíkur en á öðrum svæðum höfuðborgarsvæðisins, eða hátt í 2000 hegningarlagabrot. Þó eiga flest þessara brota sér stað á afmörkuðu svæði innan hverfisins og á afmörkuðum tíma, þegar skemmtanalíf borgarbúa fer þar fram að næturlagi um helgar.

Niðurstöður spurningakönnunarinnar sýna meðal annars að 91 prósent íbúa höfuðborgarsvæðisins telja lögreglu skila góðu starfi í sínu hverfi við að stemma stigu við afbrotum og jókst ánægjan frá síðustu könnun. Þá töldu tæplega 74 prósent lögregluna aðgengilega í sínu hverfi.

Þegar spurt var hvaða afbrot fólk áleit vera mesta vandamálið í sínu hverfi nefndu flestir innbrot eða mun fleiri en í síðustu könnun. Færri nefndu hins vegar umferðarlagabrot sem mesta vandamálið árið 2008 samanborið við fyrri ár.