Everton búið að útvega Banega atvinnuleyfi

Búist er við því að enska úrvalsdeildarfélagið Everton muni í dag ganga frá lánssamningi við Argentínumanninn Ever Banega út yfirstandandi leiktíð en leikmaðurinn er á mála hjá Valencia á Spáni.

Knattspyrnustjórinn David Moyes hjá Everton líkir Banega við Mikel Arteta og staðfestir að félagið hafi forkaupsrétt á leikmanninum að lánstímanum loknum.

„Við erum búnir að ná samkomulagi við Valencia og erum jafnframt búnir að fá atvinnuleyfi fyrir leikmanninn. Banega er mjög hæfileikaríkur og er ekki ósvipaður leikmaður og Arteta. Hann dreifir spili vel og er einnig góður að halda boltanum," segir Moyes í viðtali á opinberri heimasíðu Everton.

Hinn 21 árs gamli Banega er ekki búinn að finna sig á Spáni með Valencia síðan hann kom þangað fyrir 18 mánuðum síðan á 15 milljónir punda frá Boca Juniors í Argentínu. Banega var á láni hjá Atletico Madrid á síðusta keppnistímabili.