Rikisstjórnin þarf að laða að erlendar fjárfestingar

Samtök iðnaðarins skora á ríkisstjórnina að leggja sitt af mörkum til þess að laða að erlendar fjárfestingar á öllum sviðum og þar með taldar þær sem leiða til hagnýtingar orkuauðlinda landsins. Þetta kemur fram í fréttatilkynningu frá Samtökum iðnaðarins.

Samtökin gagnrýna harðlega vinnubrögð stjórnvalda í samskiptum við erlenda fjárfesta og beislun og nýtingu orkuauðlinda til uppbyggingar atvinnustarfsemi í landinu. Togstreitan innan ríkisstjórnarinnar í þessum efnum sé á góðri leið með að valda þjóðinni miklum búsifjum.

Samtök iðnaðarins segja engar haldbærar skýringar á því að viljayfirlýsing um álver á Bakka hafi ekki verið framlengd. Engir aðrir hafi í neinni alvöru sett fram raunhæfar hugmyndir um nýtingu orkunnar. Hugmyndir þar sem vilji og geta til framkvæmda fylgi máli. Eini fjárfestirinn sem það hafi gert sé Alcoa, fjárfestir sem hafi þegar sýnt og sannað að hann hafi getu og vilja til framkvæmda.