Innlent

Sjálfstæðisflokkurinn: Stefnan brást ekki - heldur fólkið

Valhöll, höfuðvígi Sjálfstæðisflokksins.
Valhöll, höfuðvígi Sjálfstæðisflokksins.

Endurreisnarnefnd Sjálfstæðisflokksins hefur sent frá sér drög að skýrslu sem ber heitið, Hvað átti Sjálfstæðisflokkurinn að gera betur?. Þar kemur meðal annars fram að stjórnvöld og Seðlabankinn hafi brugðist of seint við mikilli stækkun bankakerfisins, nauðsynlegt hefði verið að auka varasjóðinn samhliða stækkun bankanna á þeim tíma sem lántökur í erlendri mynt á hæfilegum kjörum voru í boði, eða stemma stigu við stækkun bankanna.

Í drögunum kemur einnig fram að stærstu mistök Seðlabankans hafi verið að samþykkja fyrir sitt leyti innlánssöfnun íslensku bankanna á erlendri grundu, fyrst og fremst Icesave.

„Hér hefði SÍ átt að grípa inn í strax (innlánssöfnunin erlendis hófst 2006) með því að leyfa ekki íslenskum útibúum bankanna erlendis að taka við innlánum sem féllu undir íslenskar innstæðutryggingar. Hvað sem lagatúlkun á formlegum skuldbindingum landsins leið mátti bankanum vera ljóst að innan EES var reiknað með að innlán væru tryggð og að viðbrögð yrðu hörð ef undan því væri vikist. Greiðslur bankanna til tryggingarsjóðs innstæðna voru of lágar þegar tekið er tillit til áhættu og útþenslu bankana. Hin öra aukning innlána þeirra sem fengin voru utan Íslands hefðu að réttu lagi átt að kalla á stóraukin framlög til sjóðsins," segir í drögunum.

Þar kemur einnig fram að Sjálfstæðisflokkurinn hefði mátt beita sér fyrir meira gagnsæi í viðskiptum almennt og eflingu siðvits.

Þegar vikið er að hugsanlegum mistökum sem flokkurinn hefur gert eru tvö atriði tiltekin. Annarsvegar er það inngangan í EES og síðan stuðningsyfirlýsing Íslands við innrás Bandaríkjamanna í Írak. Bæði stuðningsyfirlýsingin og ákvarðanatökuferlið.

„Ekkert þeirra mistaka sem hér hefur verið nefnd má rekja til stefnu flokksins. Stefna Sjálfstæðisflokksins brást ekki, heldur fólk. Hrun íslensks efnahagskerfis orsakast af mörgum samverkandi þáttum, þ.m.t. rekstri eigenda og stjórnenda bankanna (sem settu þá í þrot), bankakreppunni og lausafjárþurrðar í heiminum.

Sjálfstæðisflokkurinn getur einvörðungu borið ábyrgð á fulltrúum sínum og þeirra aðgerðum eða aðgerðaleysi þeirra, en ekki bankamönnum eða stöðu alþjóðasamfélagsins hverju sinni. Það er á tímum sem þessum sem hvað mest þörf er á að fylgja stefnu Sjálfstæðisflokksins - að dregnum lærdómi af framansögðu," segir í niðurlagi.

Drög að skýrslunni má sjá hér.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.