Fengu árs bann fyrir að ráðast á dómara

Tveir leikmenn 3. deildarliðsins Afríku voru í dag dæmdir í eins árs keppnisbann af aga- og úrskurðarnefnd KSÍ. Þeir réðust á dómara sem dæmdi leik Afríku og Ýmis á Leiknisvelli í gær.

Dómari leiksins, Þórður Már Gylfason, fékk högg í andlitið. Það var svo í leikslok sem Afríkumennirnir gerðu aðsúg að dómaratríóinu sem komst undan og lokaði sig inni þar til lögreglan kom til aðstoðar.

Leikmennirnir tveir sem fengu 12 mánaða keppnisbann eru Afrim Haxholli og Joao Ramos Rocha. Afrim Haxholli er markvörður liðsins en fyrr á þessu ári fékk hann tveggja mánaða keppnisbann fyrir að kýla mótherja í leik gegn Árborg.

Fram kom í fréttum Stöðvar 2 í kvöld að möguleiki sé á að leikbönn þeirra Haxholli og Rocha verði lengd enn frekar en aganefndin býður eftir frekari gögnum.

Ragnar Bogi Petersen, þjálfari Ýmis, sagði í viðtali við Fótbolta.net að aðför leikmannana að dómurunum í gær hafi verið mjög ljót. Markvörður Ýmis var meðal annars sleginn í andlitið þegar hann tók högg af dómaranum. Þá tók Ragnar það fram að leikurinn hafi verið mjög vel dæmdur að sínu mati.

Það er oft mikill hiti í leikjum Afríku í 3. deildinni en liðið er að langmestu leyti skipað innflytjendum.