Stephen Warnock til Aston Villa

Aston Villa hefur keypt varnarmanninn Stephen Warnock af Blackburn en kaupverðið var ekki uppgefið.

Warnock skrifaði undir fjögurra ára samning við Villa. Félagið er einnig sterklega orðað við Richard Dunne, varnarmann Manchester City.

„Helsta markmiðið er að reyna að komast í hóp efstu fjögurra liða í ensku úrvalsdeildinni," sagði Warnock í viðtali sem birtist á heimasíðu félagsins í kvöld.

Warnock hóf ferilinn hjá Liverpool og kom við sögu í alls 67 leikjum með félaginu á árunum 2004 til 2007. Hann var þá seldur til Blackburn en hann er 27 ára gamall.

Hann hefur verið valinn í enska landsliðshópinn í nokkur skipti á sínum ferli en aðeins komið við sögu í einum leik en þá lék hann einungis í sex mínútur.