Manchester City orðað við Ribery og Tardelli

Breskir fjölmiðlar eru greinilega byrjaðir að búa sig undir áframhaldandi peningaeyðslu hjá Manchester City þegar félagaskiptaglugginn opnar að nýju í janúar.

The Sun vill meina að City sé með 65 milljón punda kauptilboð í franska vængmanninn Franck Ribery hjá Bayern München í burðarliðnum en Ribery var sterklega orðaður við spænsku stórliðin Barcelona og Real Madrid í sumar.

Daily Mirror kveðst hins vegar hafa heimildir fyrir því að City sé búið að senda njósnara til þess að fylgjast með brasilíska landsliðsmanninum Diego Tardelli hjá Atletico Mineiro. Hinn 24 ára gamli Tardelli hefur farið mikinn með Atletico Mineiro síðan hann gekk í raðir félagsins frá Flamengo á þessu ári og skorað 37 mörk í 47 leikjum.