Háskólinn gerir ekki ráð fyrir veikindum vegna svínaflensunnar

„Þetta mun koma sér mjög illa af mörgum ástæðum en sterkast vega líklega þau rök að fólk fær ekki greidd út námslánin sín fyrr en um vorið lendi þau í veikindum eða falli og nú má búast við mun meiri veikindaforföllum í prófunum vegna svínaflensufaraldursins," segir Hildur Björnsdóttir, formaður stúdentaráðs Háskóla Íslands, sem er allt annað en sátt með ákvörðun fimm deilda sem hafa ákveðið að afnema sjúkra- og upptökupróf í janúar og júní. Stúdentaráð telur að um lögbrot sé að ræða.

Umræddar deildir eru laga-, viðskiptafræði-, hagfræði-, sálfræði- og félagsráðgjafardeild skólans. Fleiri deildir Háskóla Íslands eru með sambærilegar breytingar til skoðunar.

Ákvörðunin er afar einkennileg í ljósi heimsfaraldurs svínaflensunnar, að mati Hildar. „Þeir stúdentar sem munu falla í desemberprófum eða lenda í veikindum geta því ekki tekið endurtekt fyrr en í maí 2010 og því munu margir hverjir sitja uppi með yfirdrátt hjá bankanum á himinháum vöxtum," segir formaðurinn.

Hildur segir að helstu rök Háskólans fyrir ákvörðuninni virðist vera sú að stúdentar misnoti sjúkraprófin. „Það er óeðlilegt að leyfa stúdentum ekki að njóta vafans og láta þannig misnotkun einhvers hóps nemenda koma niður á þeim sem virkilega eru veikir og þurfa á sjúkra- og upptökuprófum að halda."

Þá bendir Hildur á að samkvæmt reglum Háskóla Íslands eigi að tilkynna nemendum skriflega eigi síðar en við upphaf kennslumisseris um allar breytingar á kennsluskrá. Það hafi ekki verið gert í umræddum deildum að lagadeild undanskilinni. „Við teljum því að hér sé um lögbrot að ræða."

Um hádegisbil í gær hófst undirskriftarsöfnun á netinu gegn ákvörðun Háskólayfirvalda. Nú hafa safnast á bilinu 1200-1300 undirskriftir. Einnig var stofnaðu hópur á Facebook í sama tilgangi fyrr í vikunni og eru meðlimir tæplega 2900 talsins. „Við hvetjum fólk til að taka þátt í undirskriftarsöfnuninni sem fram fer á netinu og skrá sig í Facebook-hópinn," segir Hildur að lokum.

Undirskriftasöfnunin fer fram hér og síðu Facebook-hópsins má sjá hér.