Santa Cruz klár fyrir grannaslaginn gegn United

Knattspyrnustjórinn Mark Hughes hjá Manchester City vonast til þess að framherjinn Roque Santa Cruz sem félagið keypti frá Blackburn í sumar á 18 milljónir punda verði klár í slaginn gegn Manchester United á Old Trafford-leikvanginum 20. september næstkomandi.

Santa Cruz er að jafna sig á hnéaðgerð sem hann gekkst undir í sumar en getur fljótt farið að æfa með City liðinu.

„Ég hugsa að það séu um það bil tvær til þrjár vikur í hann. Ég vill ekki setja nákvæmlega niður hvenær hann gæti byrjað að spila en honum hefur gengið vel í endurhæfingunni og gæti mögulega náð leiknum gegn Manchester United. Við vonum það besta alla vega," segir Hughes í viðtali á opinberri heimasíðu City.