Redknapp vill halda Pavlyuchenko hjá Tottenham

Knattspyrnustjórinn Harry Redknapp hjá Tottenham vísar því á bug að hann sé að leitast eftir því að selja framherjann Roman Pavlyuchenko frá félaginu.

Pavlyuchenko hefur átt erfitt uppdráttar eftir að Lundúnafélagið keypti Peter Crouch og fékk Robbie Keane aftur og hefur verið orðaður við félagaskipti til Zenit í St. Pétursborg og AC Milan. Redknapp segist þó vilja halda honum áfram á White Hart Lane.

„Það er ekki rétt að okkur hafi borist kauptilboð í Pavlyuchenko. Ef það hefði gerst þá myndi ég vita af því og ég hef ekkert heyrt. Pavlyuchenko er frábær leikmaður og ég verð að viðurkenna ég ég vorkenni honum smávegis vegna þess að ég er með þrjá framherja sem hafa verið að spila meira en hann og þeir hafa allir skorað þrennu það sem af er tímabilinu. Ég vill hins vegar ekki missa Pavlyuchenko frá Tottenham," segir Redknapp í viðtali við Sky Sports fréttastofuna.