Gomes hugsanlega lengi frá - James orðaður við Tottenham

Tottenham er búið að byrja keppnistímbilið í ensku úrvalsdeildinni af miklum krafti og unnið báða leiki sína til þessa gegn Liverpool og Hull.

Lundúnafélagið varð þó fyrir áfalli í leiknum gegn Hull þar sem markvörðurinn Heurelho Gomes þurfti að yfirgefa völlinn í fyrri hálfleik vegna meiðsla.

Brasilíumaðurinn fer í gegnum skoðanir á hægra læri í dag til þess að ganga úr skugga um hversu alvarleg meiðslin eru en jafnvel er búist við því að leikmaðurinn verði lengi frá.

Tottenham stendur þá aðeins eftir með Carlo Cudicini eftir að hafa sent bæði Ben Alnwick og David Button burt á lánssamningum.

Knattspyrnustjórinn Harry Redknapp hefur gefið vísbendingar um að hann ætli að kaupa nýjan markvörð áður en félagsskiptaglugginn lokar 1. september næstkomandi og hefur David James hjá Portsmouth nú verið sterklega orðaður við endurfundi við Redknapp.

„Við verðum að sjá til hversu lengi Gomes verður frá því utan við hann er ég bara með Cudicini eins og staðan er í dag. Við sjáum til hvað gerist," sagði Redknapp í viðtölum í leikslok í gærkvöld.