Tveir leikmenn úr ensku úrvalsdeildinni handteknir

Tveir ungir enskir knattspyrnumenn hafa verið handteknir síðustu tvo daga, annar þeirra á æfingu með Aston Villa.

Isaiah Osbourne, leikmaður Villa, var handtekinn á æfingu liðsins í dag grunaður um að hafa átt þátt í því að skipuleggja rán.

Osbourne er 21 árs gamall og á að baki fjölmarga leiki með félaginu. Hann lék til að mynda með Aston Villa þegar liðið mætti FH í UEFA-bikarkeppninni í fyrra.

Hinn knattspyrnumaðurinn sem var handtekinn heitir Jose Baxter og er sautján ára leikmaður hjá Everton.

Baxter var handtekinn í gær ásamt tveimur öðrum mönnum þegar lögregla stöðvaði bifreið sem þeir voru í. Í bílnum fannst kannabis og falsaðir peningaseðlar.

Öllum hefur verið sleppt úr lögregluhaldi en móðir leikmannsins hefur sagt í samtali við enska fjölmiðla að sonur sinn sé alsaklaus í þessu máli.