Nýr auðlegðarskattur

Nýr skattur, svo kallaður auðlegðarskattur, verður lagður á nettóeignir umfram 90 milljónir. Á móti verður hætt við lækkun barna- og vaxtabóta á næsta ári. Innheimta tekjuskatts einstaklinga á að skila ríkissjóði 38 milljörðum í auknar tekjur á næsta ári.

Tekjur ríkissjóðs af tekjuskatti einstaklinga á þessu ári var 107 milljarðar króna en verða 143,5 milljarðar á næsta ári. Nýr skattur, auðlegðarskattur verður lagður á tímabundið í þrjú ár. Hann verður 1,25 prósent og leggst á hreina eign einstaklings umfram 90 milljónir og 120 milljónir hjá hjónum.

Fjármálaráðherra segir þennan skatt lagðan á til að þeir sem högnuðust hvað mest á eignabólunni skili einhverju aftur til þjóðfélagsins. Reiknað er með að þessi skattur fari til hækkunar vaxtabóta upp á 2,2 milljarða og standi undir því að hætt verði við að lækka barnabætur um milljarð eins og til stóð. Fjármálaráðherra segir að nýtt þriggja þrepa tekjuskattskerfi auki jöfnuð í skattkerfinu.

„Við skulum átta okkur á því þegar við tökum kúrfuna yfir prósentuna af heildarlaunum þá er langstærsti launamanna að borga 15-25% af sínum heildarlaunum í skatt. Það fara engir upp fyrir 40% af heildarlaunum í skatt fyrr en þeir eru komnir með yfir 30 milljónir í fjölskyldutekjur," segir Steingrímur J. Sigfússon, fjármálaráðherra.

Jóhanna Sigurðardóttir, forsætisráðherra, segir að þótt skattar aukist verulega telji ríkisstjórnin að verið sé að jafna byrðum meira en verið hafi í skattkerfinu hingað til.

„Sérstaðan frá gamla kerfinu er sú að þetta bætir mjög stöðu þeirra lægst launuðu og færir byrðar til þeirra sem var hlíft í gamla skattkerfinu hjá Sjálfstæðisflokknum og Framsóknarflokknum," segir Jóhanna.

Ríkisstjórnin telur að verðlagsáhrif skattbreytinganna í heild sinni verði um 0.8 prósent á næsta ári.