Cattermole samdi við Sunderland

Miðvallarleikmaðurinn Lee Cattermole hefur gengið í raðir Sunderland sem keypti hann fyrir sex milljónir punda frá Wigan.

Þetta er í annað sinn sem núverandi stjóri Sunderland, Steve Bruce, kaupir Cattermole. Það gerði hann fyrir ári síðan er hann keypti hann til Wigan frá Middlesbrough fyrir 3,5 milljónir punda.

Cattermole kom við sögu í 33 leikjum í ensku úrvalsdeildinni á síðasta tímabili og skoraði í þeim eitt mark. Hann leikur með U-21 landsliði Englands.

Þetta er fimmti leikmaðurinn sem Bruce kaupir í sumar. Hann hafði áður fengið þá Darren Bent, Lorik Cana, Frazier Campbell og Paulo Da Silva.

Roberto Martinez, stjóri Wigan, var óánægður með að missa Cattermole en þó sáttur við söluverðið. „Þetta er mun meira en félagið borgaði fyrir hann í fyrra og þriðji dýrasti leikmaður sem félagið hefur selt," sagði Martinez.