Umfjöllun: Flottur síðari hálfleikur skilaði sigri

Ísland vann í dag 2-1 sigur á Norður-Írlandi og vann þar með sinn þriðja sigur í röð. Liðið er með níu stig í sínum riðli í undankeppni EM 2011 eftir fyrstu fjóra leikina.

Leikið var í Grindavík en það voru Jóhann Berg Guðmundsson og heimamaðurinn Jósef Kristinn Jósefsson sem skoruðu mörk Íslands. Norður-Írar minnkuðu svo muninn þegar skammt var til leiksloka en þar við sat.

Ísland byrjaði af miklum krafti og ætlaði greinilega að keyra hratt á norður-írsku vörnina, rétt eins og í fyrri leik liðanna ytra þegar Ísland vann ótrúlegan 6-2 sigur.

En í þetta sinn gekk afar illa að skapa sér færi og átti Ísland ekki almennilega marktilraun fyrr en vel var liðið á leikinn.

Gestirnir náðu því að vinna sig inn í leikinn eftir því sem á leið og fengu hættulegri færi í fyrri hálfleik en Ísland. Engin dauðafæri þó og var fyrri hálfleikur því nokkuð daufur.

Íslendingar byrjuðu aftur af fullum krafti í síðari hálfleik og náðu nú að fylgja því eftir með öflugum sóknum.

Á 56. mínútu átti Gylfi Þór Sigurðsson góða sendingu á hægri kantinn á Andrés Má Vilhjálmsson sem kom sér í góða stöðu. Hann gaf boltann fyrir markið á Jóhann Berg sem skoraði af stuttu færi. Afar lagleg og árangursrík sókn.

Gestirnir sóttu í sig veðrið eftir þetta og ógnuðu íslenska markinu í nokkur skipti. Það gaf þó íslenska liðinu færi á skyndisóknum og liðið var nærri búið að skora annað mark eftir eina slíka á 67. mínútu.

Kolbeinn Sigþórsson var þá nýkominn inn á sem varamaður og óhætt að segja að sóknarleikur íslenska liðsins hafi gjörbreyst við það. Kolbeinn lét mikið af sér kveða og svaraði því fullum hálsi að hann var settur á bekkinn fyrir leikinn.

Á 70. mínútu átti Kolbeinn flotta sendingu á Andrés Má sem var sjálfur kominn í góða stöðu fyrir framan mark Norður-Íra. Hann ákvað hins vegar að gefa fyrir markið þar sem annar varamaður, Jósef Kristinn, var mættur og skoraði með föstu skoti á fjarstöng.

Aðeins fjórum mínútum síðar varði Jósef svo á línu eftir að gestirnir gerðu harða hríð að marki Íslendinga. Norður-Írar sóttu nokkuð stíft á þessum mínútum og stíflan brast loksins tíu mínútum fyrir leikslok er James Lawrie skoraði af stuttu færi eftir að Haraldur Björnsson hafði varið skot félaga hans.

Norður-Írar reyndu hvað þeir gátu til að jafna metin en allt kom fyrir ekki. Ísland fagnaði góðum sigri.

Eyjólfur Sverrisson var reyndar sendur upp í stúku á lokamínútum leiksins fyrir að mótmæla dómgæslu dómara leiksins sem kom frá Austurríki.

Ísland - Norður-Írland 2-1

1-0 Jóhann Berg Guðmundsson (56.)

2-0 Jósef Kristinn Jósefsson (70.)

2-1 James Lawrie (80.)

Grindavíkurvöllur. Áhorfendur: 278.

Dómari: Friz Stuchlik, Austurríki.

Skot (á mark): 14-11 (4-3)

Varin skot: Haraldur 1 - O'Neill 2

Horn: 8-4

Aukaspyrnur fengnar: 16-14

Rangstöður: 1-1

Ísland (4-5-1):

Haraldur Björnsson

Skúli Jón Friðgeirsson

Elfar Freyr Helgason

Jón Guðni Fjóluson

Hjörtur Logi Valgarðsson

(65. Jósef Kristinn Jósefsson)

Andrés Már Jóhannesson

(89. Kristinn Steindórsson)

Gylfi Þór Sigurðsson

Guðmundur Kristjánsson

Almarr Ormarsson

Jóhann Berg Guðmundsson

Alfreð Finnbogason

(59. Kolbeinn Steindórsson)