Guardiola: Barcelona er ekki að reyna að fá Robinho

Brasilíumaðurinn Robinho hjá Manchester City hefur verið sterklega orðaður við félagsskipti frá enska félaginu í sumar og var í gær sterklega orðaður við Barcelona.

Knattspyrnustjórinn Pep Guardiola hjá Barcelona hefur aftur á móti neitað því að spænska félagið sé með kauptilboð í burðarliðnum nú aðeins ári eftir að Robinho yfirgaf Real Madrid fyrir City.

„Hann kemur ekki til okkar. Hann kom til City síðasta sumar og er stjörnuleikmaður þeirra og það er óraunhæft að hann muni yfirgefa herbúðir félagsins núna," sagði Guardiola í viðtali við EFE.