Gillett: Gengi liðsins stjóranum að kenna

George Gillett, annar eiganda Liverpool, segir að það sé ekki eigendunum félagsins að kenna ef liðið nær ekki góðum árangri, heldur stjóranum.

Þetta mun hann hafa sagt á samkomu með stuðningsmannahópi Liverpool sem kallar sig Spirit of Shankly fyrir leik Liverpool og Hull um þarsíðustu helgi.

Liverpool tapaði svo bæði fyrir Fiorentina og Chelsea í síðustu viku og á erfiða leiki fyrir höndum eftir landsleikjafríið.

„Við höfum sett meiri pening í félagið en keppinautar okkar. Alls höfum við lagt fram 128 milljónir punda á undanförnum átján mánuðum til viðbótar við tekjur félagsins," mun Gillett hafa sagt.

„Og ef liðinu tekst ekki að bæta sig þá er það ekki Gillett og Hicks að kenna. Heldur stjóranum eða annarri starfssemi. Það verður að líta á heildarmyndina."

Gillett sagði einnig að þær 30 milljónir punda sem fengust fyrir Xabi Alonso hafi allar farið í leikmannakaup.

„Félagið er í mjög sterkri stöðu hvað fjárhag varðar - mun betri en Manchester United, Chelsea og Arsenal. Aðeins Manchester City hefur lagt fram meiri pening en við."