Heimir: Töluðum bara um gervigrasið á jákvæðum nótum

„Þetta var mikill baráttu leikur og við vissum að þeir myndu reyna að sækja fast á okkur með háum sendingum fram völlinn og berjast um seinni boltann. Það tók okkur svona 10-15 mínútur að finna taktinn og venjast vellinum en eftir það fannst mér við vera sterkari aðilinn.

Við vorum að spila betur sem lið og menn voru að styðja hvorn annan betur í varnarleiknum en við höfum verið að gera og ég er sérstaklega ánægður með það," segir Heimir Guðjónsson, þjálfari FH, eftir 1-4 sigur liðs síns í kvöld.

Mikið hefur verið vælt og skælt út af gervigrasi Stjörnumanna í sumar, þar sem heimamenn hafa verið óvinnandi í meira en ár, en FH-ingar voru ákveðnir í að nálgast leikinn með jákvæðum hætti.

„Við ákváðum það í vikunni fyrir þennan leik að tala bara um gervigrasið á jákvæðum nótum og vera ekkert að spá í það heldur bara einbeita okkur að okkar leik og mér fannst við gera það. Lið eru að koma hingað í einhverri svartsýni og það er bara rugl.

Við mættum bara á svæðið til þess að vinna fótboltaleik og það gekk eftir og við unnum sanngjarnan sigur," segir Heimir.