Heil umferð í Pepsi-deild karla í kvöld

Heil umferð fer fram í Pepsi-deild karla í fótbolta í kvöld. Spútniklið Stjörnunnar situr á toppi deildarinnar fyrir sjöttu umferðina og fær verðugt verkefni þegar það heimsækir Keflvíkinga í kvöld.

Keflvíkingar hafa til þessa verið illviðráðanlegir á heimavelli og unnið alla þrjá leiki sína þar og ekki enn fengið á sig mark á Sparisjóðsvellinum.

Íslandsmeistarar FH sitja við hlið Stjörnunnar á toppnum eftir fjóra sigra í röð eftir tap í fyrstu umferð en þeir mæta Fjölnismönnum í Kaplakrika í kvöld.

Fylkir og KR fylgja fast á eftir toppliðunum en þau eigast einmitt við á Fylkisvellinum í Árbæ.

Valur og Þróttur mætast á Vodafonevellinum en botnlið Þróttar er eina lið deildarinnar sem ekki hefur enn unnið leik.

Þá mætast Fram og Breiðablik á Laugardalsvelli og Grindvíkingar heimsækja ÍBV á Hásteinsvöll.

Fimm leikir kvöldsins hefjast kl. 19.15 en leikur Fylkis og KR hefst kl. 20 og að sjálfsögðu verður hægt að fylgjast með gangi mála á Boltavakt Vísis og Fréttablaðsins.