Arnór: Ekkert komið úr viðræðum við West Ham

Arnór Guðjohnsen, faðir og umboðsmaður Eiðs Smára Guðjohnsen, segir að ekkert hafi enn komið úr viðræðum þeirra við enska úrvalsdeildarfélagið West Ham.

„Það er afskaplega lítið að frétta af hans málum," sagði Arnór í samtali við Vísi. Hann sagði þá þó hafa átt í viðræðum við fleiri félög en West Ham. „Ég get þó ekki greint frá því hvaða félög það eru," bætti hann við.

Eiður Smári á enn eitt ár eftir af samningi sínum við Barcelona og vildi Arnór ekki útiloka að hann yrði áfram hjá félaginu. Félagaskiptaglugginn lokar um næstu mánaðamót og því tíminn að renna út fyrir Eið Smára. „Það er ómögulegt að segja hvað gerist. Það vill oft vera þannig að þessir hlutir gangi hratt fyrir sig á lokakaflanum," sagði Arnór.