Campbell stefnir enn á landsliðið

Sol Campbell stefnir enn að því að vinna sér sæti í enska landsliðinu þó svo að hann spili nú með Notts County í ensku D-deildinni.

Ef England vinnur Króatíu á miðvikudag verður farseðillinn á HM í Suður-Afríku tryggður og vill Campbell vera hluti af landsliðshópi Englands þá.

Fabio Capello landsliðsþjálfari hefur þó aldrei valið Campbell í landsliðið síðan hann tók við.

„Ég myndi mjög gjarnan vilja vera í HM-hópnum. Af hverju ekki?" sagði hann í samtali við News of the World.

„Ég á ekki von á því að allt í einu muni ég taka upp á því að spila illa. Það er því aldrei að vita."

Hann sagði að honum hefði staðið til boða að spila áfram í ensku úrvalsdeildinni. Þrjú félög vildu fá hann til liðs við sig.

„Mér stóð líka til boða að spila erlendis. En Sven-Göran Eriksson og Notts County gerðu mér fyllilega grein fyrir því að félagið vildi fá mig og því fór ég þangað. Þeir sannfærðu mig um að taka þátt í því að láta draum þeirra rætast. Ég er sáttur við mína ákvörðun."