Manchester City í vandræðum eins og Chelsea og Manchester United

Franska liðið Rennes hefur kvartað yfir vinnubrögðum enska liðsins Manchester City sem samdi við franska unglinginn Jeremy Helan fyrr á árinu eftir að Helan hafi ákveðið að skrifa ekki undir sinn fyrsta atvinnumannasamning við uppeldisfélag sitt.

Manchester United var á eftir Helan árið 2008 en Rennes hélt þá í sinn mann en missti hann yfir til City án þess að fá neitt fyrir hann.

Málið líkist mjög því sem Chelsea var dæmt fyrir á dögunum en Chelsea má ekki kaupa nýja leikmenn fyrr en árið 2011 þar sem liðið hafði staðið ólöglega að félagsskiptum hins 16 ára gamla Gael Kakuta frá RC Lens árið 2007.

"Manchester City verður að átta sig á afleiðingum gerða sinna í Helen-málinu því aðferðir þeirra þar voru enn ólöglegri en þær sem Chelsea viðgengst við að ná í Kakuta," sagði Pierre Dreossi, yfirmaður tæknimála hjá Rennes við enska blaðið The Independent. Hann býst þó ekki við því að niðurstaða í málinu komi fyrr en eftir einhver ár.

Franska liðið Le Havre hefur kvartað við FIFA undan vinnubrögðum Manchester United vegna samnings enska liðsins við hinn 16 ára gamla Paul Pogba.

Manchester City hefur neitað allri sök alveg eins og nágrannar þeirra í United en það má þó engu að síður búast við rannsókn á málinu af hálfu FIFA.