Forseti Bilbao segir Amorebieta ekki vera til sölu

Knattspyrnustjórinn Rafa Benitez hjá Liverpool hefur ekki farið leynt með að hann sé á höttunum eftir varnarmanni og samkvæmt enskum og spænskum fjölmiðlum í gær er Fernando Amorebieta, varnarmaður Atletico Bilbao, sagður ofarlega á óskalistanum.

Forseti spænska félagsins hefur hins vegar ítrekað að hinn 24 ára gamli Amorebieta sé ekki til sölu og kannast ekkert við áhuga Liverpool.

„Fyrir það fyrsta þá höfum við ekki fengið neina fyrirspurn frá Liverpool varðandi Amorebieta en þess utan er leikmaðurinn ekki til sölu. Hann er lykilmaður hjá Bilbao og við höfum engan áhuga á að missa hann frá okkur," Fernando Macua, forseti Atletico Bilbao.