Werder Bremen búið að kaupa Pizarro

Martraðartími Perúmannsins Claudio Pizarro hjá Chelsea er nú loks á enda en hann er genginn til liðs við þýska félagið Werder Bremen.

Pizarro var í láni hjá Bremen á síðustu leiktíð og skoraði þá 17 mörk og heillaði forráðamenn félagsins það mikið að nú hefur hann verið keyptur til félagsins.

Pizarro kom til Chelsea árið 2007 en lék aðeins 21 leik á ferli sínum með Lundúnafélaginu og skoraði 2 mörk.

Hann fékk að spreyta sig á undirbúningstímabilinu með Chelsea en gerði ekki nóg til þess að heilla Carlo Ancelotti.