Wenger: Fáum virðingu ef við spilum vel gegn liði eins og Celtic

Fimm leikir fara fram í undankeppni Meistaradeildarinnar í kvöld þar sem flestra augu verða án vafa á leik Arsenal og Celtic í baráttunni um Bretland á Celtic Park-leikvanginum í Glasgow.

Knattspyrnustjórinn Arsene Wenger hjá Arsenal á von á hörku leik en er að sama skapi fullur tilhlökkunnar.

„Við erum undir pressu að leika vel og ná árangri og þetta er því gríðarlega stór leikur fyrir okkur. Það eru líka þannig leikir sem þú vilt taka þátt í og ég tel að við munum fá virðingu ef við spilum vel gegn liði eins og Celtic.

Við erum heldur ekkert smeykir við að fara til Skotlands þó svo að andrúmsloftið geti verið óvingjarnlegt á pöllunum þar sem við erum vanir því að spila víðs vegar um Evrópu við alls kyns aðstæður," segir Wenger.

Cesc Fabregas, Bacary Sagna og Denilson eru tæpir fyrir leikinn í kvöld vegna meiðsla en Theo Walcott, Tomas Rosicky og Samir Nasri eru allir enn meiddir og verða pottþétt ekki með Lundúnafélaginu.

Leikir kvöldsins í undankeppni Meistaradeildarinnar:

Celtic-Arsenal

FC Köbenhavn-Apoel Nicosia

FC Sheriff Tiraspol-Olympiakos

Politehnica Timisoara-Stuttgart

Sporting-Fiorentina

Seinni leikir liðanna fara fram 26. ágúst.