Duff genginn í raðir Fulham

„Ég er gríðarlega ánægður með að félagsskipti mín til Fulham eru gengin í gegn og get ekki beðið eftir því að komast af stað og byrja að leika með liðinu," segir Duff í viðtali á opinberri heimasíðu Fulham.

Kaupverðið er ekki gefið upp en talið er að Fulham hafi þurft að greiða Newcastle 4 milljónir punda fyrir þjónustu írska landsliðsmannsins.

Knattspyrnustjórinn Roy Hodgson hjá Fulham er sáttur með að fá liðsstyrkinn en Duff lék einmitt undir Hodgson hjá Blackburn á sínum tíma.

„Ég hef þekkt Damien í meira en áratug síðan hann komst í liðið hjá Blackburn og ég veit nákvæmlega hvað hann getur og get ekki beðið eftir því að vinna aftur með honum," segir Hodgson.