Belgar vilja láta banna Fellaini að spila um helgina

Belgíska knattspyrnusambandið hefur farið fram á að FIFA banni Marouane Fellaini að spila með Everton í ensku úrvalsdeildinni nú um helgina.

Fellaini spilaði með belgíska landsliðinu gegn Tyrklandi um helgina en dró sig svo úr hópnum fyrir leik liðsins gegn Eistlandi á morgun þar sem hann þarf að fara í endajaxlatöku.

Forráðamenn Everton halda því fram að Fellaini hafi fengið frí hjá Dick Advocaat, landsliðsþjálfara Belga, í leiknum á morgun en því neitar belgíska knattspyrnusambandið.

Það hefur því farið fram á að fimm daga reglunni verði beitt og Fellaini því gert óheimilt að spila með Everton um helgina.

Fimm daga reglan kveður á um að leikmaður sem missir af landsleik án þess að hafa fengið leyfi til þess er óheimilt að spila með sínu félagsliði næstu fimm daga eftir landsleikinn.

Everton mætir Wolves nú um helgina.