Tevez-málið líklega ekki úr sögunni eftir allt saman

Stjórn enska úrvalsdeildarfélagsins West Ham hefur ráðið til sín einn þekktasta lögfræðinginn í Lundúnum sem ráðgjafa í fyrirhuguðum málaferlum út af Tevez-málinu svokallaða.

Til að gera langa sögu stutta þá stóð málið á milli West Ham og Sheffield United þar sem fyrrnefnda félaginu var gefið að sök að hafa notað ólöglegan mann, Carlos Tevez, í fallbaráttu ensku úrvalsdeildarinnar 2007. West Ham náði með naumyndum að bjarga sér frá falli á kostnað Sheffield United.

West Ham var gert að borga 5,5 milljónir punda til ensku úrvalsdeildarinnar fyrir að uppfylla ekki skráingarkröfur fyrir Tevez. Sheffield United höfðaði svo mál á hendur West Ham sem var að lokum leyst utan dómshúsa með því að West Ham félst á að greiða 20 milljónir punda á umsömdum tíma.

Nú lítur hins vegar út fyrir að fleiri félög ætli einnig að höfða mál gegn West Ham út af Tevez. Fulham er til að mynda sagt vera þegar búið að leggja fram kæru þar sem West Ham, sem endaði tímabilið í 15. sæti, hafi fengið hærra verðlaunafé heldur en Fulham, sem endaði í 16. sæti, í lok tímabilsins árið 2007 útaf Tevez.

Þá mun Leeds vera að skoða möguleikann á að kæra West Ham þar sem leikmenn sem félagið seldi til Sheffield United hefðu skilað sér í meiri hagnaði fyrir Leeds ef Sheffield United hefði haldið sér uppi í ensku úrvalsdeildinni.