Ferdinand ætlar að ná leiknum gegn Tottenham

Rio Ferdinand hefur sett sér það markmið að vera orðinn góður af meiðslum sínum fyrir leik Manchester United gegn Tottenham í ensku úrvalsdeildinni þann 12. september næstkomandi.

Búist var við því að Ferdinand yrði frá í mánuð er hann meiddist á æfingu fyrir tveimur vikum síðan og mun hann missa af leik enska landsliðsins gegn Króatíu í undankeppni HM 2010 þann 9. september.

„Vonandi verð ég orðinn klár í slaginn strax eftir landsleikafríið og stefni ég á það. Ég hef verið að æfa stíft síðustu daga."

Ferdinand missir einnig af leik United gegn Arsenal á laugardaginn.