Andy Johnson líklega frá vegna meiðsla í átta vikur

Frækinn 3-1 sigur Fulham gegn rússneska félaginu Amkar Perm í Evrópudeild UEFA í gærkvöld reyndist dýrkeyptur fyrir Lundúnafélagið þar sem framherjinn Andy Johnson, sem skoraði fyrsta mark leiksins, þurfti að yfirgefa völlinn þegar hann fór úr axlarlið eftir klukkutíma leik.

Knattspyrnustjórinn Roy Hodgson hjá Fulham staðfesti í leikslok að allt útlit væri fyrir að Johnson yrði nú frá vegna meiðslanna í átta vikur eða svo.

Fregnirnar eru mikið áfall fyrir Fulham þar sem Johnson er lykilmaður í sóknarleik liðsins en félagið byrjaði á sigri í ensku úrvalsdeildinni og á góðan möguleika á að komast í riðlakeppni Evrópudeildarinnar.