Agnar Bragi: Tileinka þetta mark ömmu minni

Varnarturninn Agnar Bragi Magnússon skoraði sigurmark Selfyssinga gegn Víkingi í kvöld. Hann fagnaði markinu af mikilli innlifun, reif sig úr að ofan og benti til himins.

„Ég tileinka ömmu minni þetta mark en hún lést á mánudaginn," sagði Agnar Bragi við Vísi eftir leik. „Það er ekki á hverjum degi sem maður skorar en ég er kominn með fjögur í sumar og það er ekki leiðinlegt."

Agnar Bragi hefur heldur betur verið heitur í leikjum gegn Víkingi en hann skoraði einnig sigurmarkið í fyrri leik liðanna á Selfossi í sumar. Þá skoraði hann einnig á Víkingsvellinum í fyrra.

„Þessi sigur gefur okkur byr undir báða vængi. Víkingum hefur gengið vel í síðustu leikjum og ætluðu sér að taka okkur létt á heimavelli. Þetta gat alveg dottið báðum megin en við gáfumst ekkert upp eftir að þeir jöfnuðu og náðum að skora sigurmarkið," sagði Agnar Bragi.

Selfoss nálgast úrvalsdeildina óðum, er með sjö stiga forskot á Hauka sem eru í öðru sætinu og með níu stigum fyrir ofan HK sem er í þriðja sætinu. „Við tökum bara einn leik fyrir í einu og stefnum næst á sigur í fyrsta leik eftir Verslunarmannahelgi;" sagði Agnar Bragi að lokum.