Umfjöllun: Agnar Bragi tryggði Selfossi sigur á Víkingum

Selfyssingar stigu enn eitt skrefið í átt að úrvalsdeild í kvöld þegar þeir unnu 2-1 útisigur á Víkingi Reykjavík. Fyrir leikinn höfðu Víkingar unnið fjóra leiki í röð í deildinni. Eftir úrslit kvöldsins er Selfoss með sjö stiga forystu í deildinni.

Selfyssingar voru mun hættulegri í fyrri hálfleik en Víkingum gekk erfiðlega að skapa sér almennileg marktækifæri. Hinn stórefnilegi Guðmundur Þórarinsson átti fyrsta alvöru skotið en það fór naumlega framhjá Víkingsmarkinu.

Sævar Þór Gíslason var ógnandi eins og oft áður í sumar og varði Magnús Þormar tvívegis virkilega vel frá honum með stuttu millibili. Kristinn Jóhannes Magnússon fékk besta færi Víkinga en skot hans var ekki nægilega kraftmikið.

Staðan var markalaus í hálfleik en þegar níu mínútur voru liðnar af seinni hálfleiknum komust gestirnir frá Selfossi yfir. Þar var að verki Jón Guðbrandsson, fyrrum leikmaður Víkings, en hann var einn og óvaldaður og skoraði með skalla eftir sendingu Guðmundar.

Víkingar voru meira með boltann eftir þetta en áfram gekk þeim erfiðlega að ógna marki gestana. Daníel Hjaltason átti ágætis skallafæri en inn vildi boltinn ekki í það skiptið. Þegar rúmar tíu mínútur voru eftir af leiknum kom svo markið. Þorvaldur Sveinn Sveinsson átti fyrirgjöf á Daníel sem náði góðum skalla og jafnaði.

Sigurmarkið kom á 86. mínútu en það skoraði miðvörðurinn Agnar Bragi Magnússon með skalla í kjölfarið á aukaspyrnu. Víkingar reyndu að jafna á lokamínútunum en það tókst ekki. Selfyssingar voru nálægt því að bæta þriðja markinu við en Chris Vorenkamp bjargaði á marklínu. Selfyssingar fengu öll þrjú stigin úr þessum stórleik kvöldsins í 1. deildinni.

Víkingur - Selfoss 1-2

0-1 Jón Guðbrandsson (54.)

1-1 Daníel Hjaltason (79.)

1-2 Agnar Bragi Magnússon (86.)