Dómsmálaráðherra hefur skipað sérstakt teymi um mansal

Ragna Árnadóttir dómsmála- og mannréttindaráðherra hefur skipað sérfræði- og samhæfingarteymi um mansal í samræmi við aðgerðaáætlun gegn mansali, sem samþykkt var á fundi ríkisstjórnar þann 17. mars síðastliðinn.

Í fréttatilkynningu frá ráðuneytinu segir að hlutverk teymisins sé meðal annars að tryggja yfirsýn og þekkingu á mansalsmálum á Íslandi, fylgja eftir vísbendingum um mansal, bera kennsl á möguleg fórnarlömb þess og tryggja þeim vernd og aðstoð. Jafnframt sé teyminu ætlað að sinna skráningu ætlaðra mansalsmála, sinna fræðslu um mansalsmál, hafa eftirlit með framkvæmd aðgerðaáætlunar og vera stjórnvöldum til ráðgjafar í mansalsmálum. Skipunartími teymisins er til 31. desember 2012.

Teymið er skipað Hildi Jónsdóttur, sem er formaður, Guðlaugu Jónasdóttur, frá dómsmála- og mannréttindaráðuneytinu, Sveini Magnússyni, frá heilbrigðisráðuneytinu, Ingibjörgu Broddadóttur, frá félags- og tryggingamálaráðuneytinu, Berglindi Eyjólfsdóttur, frá Ríkislögreglustjóra, Guðrúnu Jónsdóttur, frá Stígamótum, Sigþrúði Guðmundsdóttur, frá Samtökum um kvennaathvarf, Ágústi Flygenring, frá utanríkisráðuneytinu og Hreiðari Eiríkssyni, frá Útlendingastofnun.

Þá hefur verið starfandi svokallað neyðarteymi vegna meints mansalsmáls að undanförnu. Um neyðarteymið er fjallað í aðgerðaáætlun gegn mansali en í teymið eru kallaðir til þeir aðilar sem sérstaka aðkomu hafa að málum þar sem grunur er um mansal, miðað við aðstæður hverju sinni.