Telja að kröfuhafar hafi verið blekktir

Staða Baugs Group er miklu verri en fram kom á fundi með kröfuhöfum félagsins. Beitt var meðvituðum blekkingum með því að leggja úreltar upplýsingar fyrir fundinn. Þetta fullyrtu lögmenn Íslandsbanka og skilanefndar Glitnis í Héraðsdómi Reykjavíkur í gær.

Þar var tekist á um þá kröfu Baugs Group að greiðslustöðvun félagsins yrði framlengd um þrjá mánuði. Félagið hefur verið í greiðslustöðvun frá 11. febrúar 2009. Bæði Íslandsbanki og skilanefnd Glitnis mótmæla framlengingu greiðslustöðvunar, og vilja að félagið verði sett í þrot.

Skuldir Baugs Group við Glitni nema um 42 milljörðum króna, sagði Andri Árnason, lögmaður skilanefndar bankans, í héraðsdómi í gær. Skuldirnar við Íslandsbanka eru tæpir 6 milljarðar króna, sagði Ingvi Hrafn Óskarsson, lögmaður bankans.

Kröfur þeirra voru svo til samhljóða. Báðir sögðu hugmyndir sem forsvarsmenn félagsins hafi sett fram um fjárhagslega endurskipulagningu óraunhæfar. Engar líkur væru á því að lífvænlegt fyrirtæki kæmi út úr endurskipulagningunni.

Stærstur hluti skulda Baugs Group við Íslandsbanka og Glitni er með tryggingum í eignum félagsins erlendis. Lögmenn bankanna sögðu veðin lítils sem einskis virði þar sem þau félög sem lögð séu til tryggingar væru flest komin í skiptameðferð, eða hefðu verið yfirtekin af kröfuhöfum.

Á fjórða tug kröfuhafa sátu fund nýverið þar sem farið var yfir stöðu Baugs Group. Af öllum þeim fjölda hafa aðeins tveir, Íslandsbanki og Glitnir, gert athugasemdir við að félagið verði áfram í greiðslustöðvun, sagði Ragnar H. Hall, lögmaður Baugs Group.

Hann segir tilganginn með áframhaldandi greiðslustöðvun vera að fá tíma fyrir fjárhagslega endurskipulagningu félagsins og nauðarsamninga við kröfuhafa. Hann benti á að félagið hefði tryggt sér nægar tekjur til að greiða allan rekstrarkostnað þann tíma sem greiðslustöðvunin myndi vara.

Ragnar hafnaði með öllu fullyrðingum um að Baugur Group hefði meðvitað reynt að blekkja kröfuhafa. „Það var ekkert rangt, villandi eða misvísandi lagt fyrir fundinn með kröfuhöfunum,“ sagði Ragnar. Slíkt séu einfaldlega staðlausir stafir.

Undir það tekur Stefán H. Hilmarsson, fjármálastjóri Baugs Group, sem sat málflutninginn í gær. Hann segir lögmenn bankanna misskilja skjöl sem þeir vísi til og tilgang þeirra.

Dómari mun úrskurða um framhald á greiðslustöðvun Baugs Group á hádegi á morgun.

brjann@frettabladid.is