Barton vill snúa við blaðinu - hættur að drekka áfengi

Miðjumaðurinn umdeildi Joey Barton hjá Newcastle hefur verið í brennideplinum undanfarin ár fyrir allt annað en fótboltahæfileika.

Barton hefur setið í fangelsi fyrir árás á ungling fyrir utan skemmtistað auk þess að fá langt leikbann fyrir að ráðast á Ousmane Dabo, þáverandi liðsfélaga sinn hjá Manchester City.

Barton hefur þess utan verið mjög óheppinn með meiðsli og brotið á sér báða fætur og verið frá vegna hnémeiðsla. Barton er sem stendur óleikfær vegna fótbrots en er staðráðinn í að snúa við blaðinu þegar hann kemst aftur á fullt og er til að mynda hættur að drekka áfengi.

„Það er ekkert sem heitir að taka réttar eða rangar ákvarðanir. Þetta snýst bara um afleiðingar og maður verður að taka afleiðingum gjörða sinna. Ég hef því ákveðið að taka aðeins til hjá mér og er til að mynda hættur að drekka áfengi. Núna bíð ég bara eftir því að verða leikfær á ný því það versta sem getur komið fyrir atvinnumann í fótbolta er að sitja á hliðarlínunni og geta ekki spilað," segir Barton í nýlegu viðtali við The Sun.