Frank Lampard: Erfiðast að spila á móti Steven Gerrard

Frank Lampard, miðjumaður Chelsea, viðurkennir að verkefni dagsins sé það erfiðasta í boltanum. Hann mætir þá félaga sínum í enska landsliðinu, Steven Gerrard, þegar lið þeirra Chelsea og Liverpool mætast í stórleik ensku úrvalsdeildarinnar. Leikurinn fer fram á Brúnni og hefst klukkan 15.00.

„Það er erfiðast að spila á móti Steven Gerrard af því hann hefur allt. Hann er hinn fullkomni miðjumaður og sá besti á Englandi. Kannski er samt mjög erfitt að spila á móti miðjumönnum Arsenal þegar liðið er í stuði en það breytir ekki því að Gerrard er sá erfiðasti fyrir mig," sagði Frank Lampard.

Lampard segir samkeppnina milli þeirra vera í góðu en þeir spila síðan hlið við hlið með enska landsliðinu. „Þetta er góð samkeppni því okkur kemur vel saman og njótum þess að spila saman með Englandi. Margir reyna að benda á að það að við séum of líkir en það hefur gengið betur hjá okkur síðasta árið," sagði Lampard sem var ekki hættur að hrósa Gerrard.

„Stevie er einn besti leikmaðurinn í Englandi og líklega í hópi þeirra bestu í heimi. Það alltaf gaman að spila með slíkum leikmönnum og það er einnig gaman að mæta þeim," sagði Lampard og hann býst við alvöru leik á Brúnni í dag.

„Ég myndi segja að Barcelona sé erfiðasti mótherji okkar í Evrópu en á Englandi er það Liveprpool-liðið. Þeir eru kannski ekki besta liðið því Manchester United er búið að sanna að þeir eru bestir en það er samt mjög erfitt að spila á móti Liverpool. Þeir gera þér erfitt fyrir að spila þinn bolta og þeir hafa mjög marga menn sem eru að setja á þig pressu," sagði Lampard.