Chimbonda að ganga í raðir Blackburn

Samkvæmt heimildum Sky Sports fréttastofunnar er hægri bakvörðurinn Pascal Chimbonda að öllum líkindum á leið til Blackburn frá Tottenham eftir að félögin komu sér saman um 2 milljon punda kaupverð á leikmanninum.

Chimbonda fór frá Tottenham til Sunderland síðasta sumar en snéri svo aftur á White Hart Lane-leikvanginn í félagsskiptaglugganum í janúar.

Chimbonda hefur hins vegar ekki náð að festa sig í sessi hjá knattspyrnustjóranum Harry Redknapp og hefur nú fallið aftur fyrir Vedran Corluka, Alan Hutton og Kyle Naugthon í goggunarröinni um hægri bakvarðastöðuna hjá Lundúnafélaginu.

„Pascal ferðast nú til Blackburn þar sem hann mun á morgun gangast undir læknisskoðun og ef allt gengur að óskum skrifa undir samning," staðfesti umboðsmaðurinn Willie McKay í samtali við Sky Sports.