Babel vill vera áfram hjá Liverpool

Ryan Babel segir það ekki rétt að hann vilji fara frá Liverpool og segist vera ánægður hjá félaginu.

Babel hefur átt erfitt með að festa sig í sessi í byrjunarliði félagsins. Hann hefur verið sagður vera áhugasamur að fara á láni til Ajax í Hollandi til að auka möguleika sína á því að vera valinn í HM-hóp Hollands fyrir úrslitakeppnina í Suður-Afríku í sumar.

„Þetta sagði ég aldrei," sagði Babel í samtali við enska fjölmiðla. „Ég veitti viðtal í Hollandi og veit ég ekki hver sá það hér í Englandi. En þetta var ein versta þýðing sem ég hef séð."

„Staðreyndin er sú að ég er mjög ánægður hér og vil ekki fara neitt. Ég vil bara einbeita mér að því að spila."

„Það er vissulega mikil samkeppni um stöður í byrjunarliðinu en þannig er það hjá öllum stærstu félögunum."

Hann segir að hann hafi rætt við Rafa Benitez, stjóra Liverpool, um fréttina þegar hún birtist fyrst og sagt honum að það væri ekki rétt sem þar hafi komið fram.