Kranjcar valdi Tottenham fram yfir Everton

Króatíski landsliðsmaðurinn Niko Kranjcar gekk sem kunnugt er í raðir Tottenham í dag áður en félagsskiptaglugginn lokaði en hann átti einnig möguleika á að fara til Everton.

„Það er rétt að Everton reyndi líka að fá mig og það er auðvitað stórt félag en Tottenham varð fyrir valinu á endanum," er haft eftir Kranjcar í viðtali við dagblaðið Jutarnjui í Króatíu.

Kranjcar skrifaði undir fjögurra ára samning við Tottenham en hjá Lundúnafélaginu hittir Kranjcar fyrir nokkur kunnuleg andlit því Knattspyrnustjórinn Harry Redknapp var áður hjá Portsmouth sem og leikmennirnir Jermain Defoe og Peter crouch.

Þá leika þeir Luka Modric og Vedran Corluka með Kranjcar í króatíska landsliðinu. Talið er að Tottenham hafi þurft að reiða fram 2,5 milljónir punda fyrir Kranjcar en samningur leikmannsins við Portsmouth átti að renna út næsta sumar.