Kranjcar á leið til Tottenham

Harry Redknapp, stjóri Tottenham, segist hæstánægður með að Niko Kranjcar sé á leið til félagsins en það mun vera formsatriði að ganga frá félagaskiptum hans frá Portsmouth.

Tottenham mun kaupa Kranjcar á 2,5 milljónir punda en það var Redknapp sem keypti hann til Portsmouth á sínum tíma.

„Ég er virkilega ánægður. Ég fékk hann til Portsmouth og hann er frábær leikmaður og drengur góður. Við erum þegar með tvo frábæra Króata hjá okkur - þá Modric og Vedran Corluka - sem geta hjálpað honum að koma sér fyrir," sagði Redknapp í viðtali við The Sun í dag.

Redknapp hefur þegar keypt þá Jermain Defoe og Peter Crouch frá Portsmouth síðan hann kom til Tottenham og er sagður nálægt því að klófesta einnig markvörðinn David James.